Arctic Winter Games 2016 ukiup affaannaa qaaangiuppat aallartissaaq. Tassunga atatillugu septembarip arferngat piviusuusaartitsilluni misiliinermi inuit 1000-it sinnerlugit Nuup qeqqanut takkupput. Silagippiarani qulisimalluni siallerpoq. Taamaakkaluartoq peqataasorpassuit misiliineq pissanganartunngortillugulu nuannersitippaat!
Inuit nuannaarlutik nipilersortunik ingiorneqarlutik takkussuupput. Ingerlaarneq Nuup qeqqaniit aallartimmat namminneq kajumissutsiminnik suleqataasussat nunanut nunallu immikkoortortaanut assigiinngitsunut AWG2016-imi marsimi 2016-imi peqataasussat naapertorlugit agguataarneqarput.

Join Feel Jump
Peqataasussat tamarmik katersuummata Join Feel Jump-itut angisuutut assilineqarput. Nipilersortut tunuliaqutigalugit peqataasut 1000-it miss. ataatsikkut pissimmata assilineqarput.
Tassanngaanniit Katuap tungaanut ingerlaarneq aallartippoq Inussivimmullu ingerlaqqittoqarluni. Inuit nuannaarlutik naapitatik ilassiortorpaat.
Inussivimmi AWG2016-ip ilisarnaatissaa nipilersugaq ”We Are The Arctic” tusartinneqarpoq. Nipilersukkamik ilisarnaammik kalaallit nipilersoqatigiit Small Time Giants sanasuupput. Peqataasut tamarmik nipilersugaq tusaallugu nuannaralugu ersaattaapput. Tamatuma kingornalu torlussortumik tumerparpaartumillu tusarnaarput. Pisup ingerlanerani tamarmi pikkunartumik silaannaqarpoq inuillu nuannallutik.
Peqataasut akornanni makitsisoqarmat makitaasut tunissuteqarfigineqarput. Tunissutigineqartut ilaatigut tassaapput timersortartut taskii Grønlandsbankenimeersut, koori Mentorix-imeersoq, Pisiffimmi tunissutissarsiniutissaq, atortussat assigiinngitsut AWG2016-imut tunngasut Torrak Fashion-imeersut, Bose høretelefonit, Ipad Mini kiisalu Iphone 6+.

Ammaanersiornivik ukiup affaa qaangiuppat, 2016-imi marsip arferngani, ingerlanneqassaaq, inuillu qilanaartut malunnarsereerluni.

Inuppassuit aaqqissuussamik iluatsitsittumik ingerlatsinermut peqataasut AWG2016-imiit qutsavigaagut!