Nuup qulaa arfininngornermi ulloq naallugu timmisartut aappalaartut DASH-8’it nipaannit qanngulualutsinneqassaaq. Nalunaaquttap akunneri 17-it atorlugit timmisartuussinissat 35-init ikinnerunngitsut pilersaarutigineqarput, peqataasorpassuit, sungiusaasorpassuit, ilaqutaasut allallu tikeraat illoqarfimmit aallartussat angallanneqassallutik.

Sapaatip akunnerata ataatsip ingerlanerani misigisaqarluarsimallutik, tallimanngornermilu unnukkut pikkunartumik naggataarnersioreerlutik aallakaapput.  Takutitsineq alutornarluinnartoq Nuummi agiartartumit Hanne Saandvig Emmanuelsenimit, isiginnaartut akornannut pilluni agiartumit, aallarnerneqarpoq. Tamatuma kingorna isiginnaartitsisarfissuaq qiimanaqisumik killitsinnartumillu qarlortarpalaamik akullugu isiginnaartitsisunit uummaarissunit tulleriaarluni takutitsiffigineqarpoq.

Takutitsinerup qiteqqunnerata missaani timersortartorpassuit nunanit qulingiluaneersut tikilluaqquneqarnerat sioqqullugu eqaarsaartartut, qitittartut, erinarsortartut, rockimik nipilersortartut aamma qilaatersortartut ilisarititsusunit Hans Henrik Suersaq Poulsenimit (torlorsorluni nammineq aamma torrallaasumit) kiisalu Maren Louise Poulsen Kristensenimit ilisaritinneqarput.

Ammaanersiornermi peqataasut immikkut isaanerannut sanilliullugu kavaajat qalipaatigissaaqisut maanna tamarmik akulerussuussimapput. Aappalaartut Team Greenland’imeersut, qasertut/qorsuit Team Northwest Territoriesimeersut, tungujortut Team Alberta North’imeersut, aappalaartut/qernertut Team Yukonimeersut, tungujortut/sungaartut Team Nunavumeersut, qasertut/sungaartut Team Alaskameersut, aappalaartut Team Sapmimeersut, qernertut/qorsuit Team Nunavik-Quebec’imeersut aamma tungujortut Team Yamalimeersut assigiinngissitaaqisumik qalipaatigissaartitsipput, nutaanik ikinngutitaartornerit ataatsimoorfeqalernerillu oqaluttuaralugit.  

Timersortartut isiginnaartitsisarfiup saavaniittut, aammalu isiginnaartorpassuit akornanni qiimmattarneq annerulerpoq nipilersortartoqatigiit Small Time Giants’ikkut AWG2016’ip pisortatigoortumik nipilersuutaat ”We are the Arctic” appimmassuk.

Taamaalillutik Nuummi tikeraartitsisut aamma Issittup sinneranit tikeraat takutitsinermik alutornarluinnartumik qummoroortarnertut ittumik qiimmassarneqarlutik imminnut inuulluaqqupput – Nuutoqqallu tungaanut illoqarfikkut ingerlaaqatigiipput,  qummooroortarneq alla, qummooroortartunik raketinik, qalipaatigissaarlutillu nipituunik sapaatip akunnera misigisaqarfioqisoq naggaserlugu.