Kattulluta qanoq angusaqarsinnaavugut, atatsimoorluta qanoq kivitsisinnaanerput qanoq annertutigiva? Nammineq kajumissutsimik suliaqartarneq pillugu seminarertoqarnerani tamakkua akissutissinniarneqarput.
 
Inuiaqatigiit akornanni nammineq kajumissutsimik suliaqartarneq qanoq ililluta kattulluta nukittorsarsinnaanissaa, 2016-imi immikkut sammineqassaaq. Ukioq tulliuttoq aallarnerlugu 2015-imi septembarip 22-anni 23-annilu Nuummi immikkut ittumik seminarertoqassaaq. KIVITSISA 2016-imi nammineq kajumissutsimik sulinerup ukiuanut atatillugu allaanerusumik seminarertoqarneratigut, kattuffiit, peqatigiiffiit suliffeqarfiillu assigiinngitsut suleqataanerisigut suliniutaasinnaasunik aalajangersimasunik ujartuisoqassaaqat.
 
GIF, AWG2016 kiisalu MIBB KIVITSISA 2016-imik aallarniisuupput seminarertoqarnissaanillu isumaginnittuussallutik. Taakkua 2014-imili ilaatigut pikkorissaasarlutik suleqatigiinnerisa kinguneranik, nunatsinni sumiiffinni assigiinngitsuni nammineq kajumissutsimik suliaqarneq pillugu pikkorissaasoqartareerpoq.
 
- Nammineq kajumissutsimik suliaqartarneq inuiaqatigiinni ataqatigiinnissamut periarfissiisarpoq. Inuit tunniusimallutik suleqataasanngitsuuppata aaqqissuunniakkat suliariniakkallu pingaarutillit annertuut amerlaqisut iluatsissimanavianngikkaluarput. Tamanna pingaaruteqarpoq, KIVITSISA 2016-imilu tassa tamanna samminiagaavoq.
 
Septembarimi seminarertoqarnisssaa inunnik isumassarsititsiniaanerinnaanani, peqataasut kingorna namminneq isumassarsianik aallartitsinissaannik aamma piumaffigineqassapput.
 
- Neriuutigaarput NGO-t, peqatigiiffiit, pisortat ingerlatsivii suliffeqarfiutaallu nunatsinni sumiiffinni assigiinngitsuneersut amerlasuut peqataajumaartut. Nammineq kajumissutsimik suliaqartarneq pillugu suliffeqarfiit iluaqutaalluartumik suleqatigiinnerisa pilersinnissaanut, KIVITISA 2016 sunniutaalluarumaartoq ilimagaarput.