- Pingajussaanik pilersaarummik nutaamik suliaqarpugut”, taamak oqarpoq Maliina Abelsen, AWG2016-imi Genereal Manager. 

 

-  Kangerlussuarmi kajumissutsiminnik suleqataasunik tunniusimasunik sulilluartunillu peqarpugut, taakani ulapittut suna tamaat taakani iluatsinnissaanut. Taakani qiimasorujussuusut tusarparput. 

 

Kisianni soorunami pilersaarutit malillugit ammaanersiornissamut tikissimanissaat kissaatigigaluarparput”, Maliina Abelsen oqarpoq. 

 

- Ippassaq silassap missingersuutigigaluarpaa ullukkut anori nittaallu annikilliartussasut. Pilersaarutit malillugit anoraaruppoq, ajoraluartumilli aporaaffiup illua tungaani apingaatsiarpoq. Tamanna isumaqarpoq timmisartut qangattarsinnaanerannut missinnaanerannulu ersinnerlupallaartoq, taamattumik timmisartuussinissat akunnernik arfineq pingasunik kinguarput, taamak oqaaseqarpoq Niels Chemnitz Frederiksen, Air Greenlandimi angallannissamut pisortaq.  

 

Nalunaarutigineqareertutut aqagu sapaammi nal. 20 ammaanersiorneq Inussivimmi ingerlanneqassaaq.

 

- Ammaanersiornissamut piffsissaq allanngortissanngilarput. Soorunami kikkut tamaasa inussivimmiitikkusukkaluarpagut, kisiannili ajornaqaaq. Sapaatip akunnera kingulleq aputissaaleqivugut. Apullu akunnattumik takkuppoq, kisiannili taamaattussaasimavoq. 

 

Naggataarnersiornissamut suna tamaat sakkugiumaarparput ingerlalluarnissaanut, taamaasilluni peqataasut tamarmik annertuumik misigisaqarlutik angerlarniassammata. Kisianni massakkut pilersaarut ingerlannialissavarput.” taamak nangippoq Maliina Abelsen. 

 

- Kajumissutsiminnik suleqataasorpassuarnut assigiinngitsunik suliaqartunut aamma suleqatigilluakkatsinnut Air Greenlandimut, Issittumilu sakkutooqarfimmut, kangerlussuarmi innuttaasunut qujamasunnera annertooq taamaallaat oqaatigisinnaavara. Atugassarititani pitsaanngitsuni annertoorujussuarmik suliaqarput – AWG2016 iluatsilluarumaarparputtaaq.

 

Pissusiviusut

 

Ippassaq pilersaarummi nutaami oqaatigivarput kangerlussuarmiit timmisartuussinissaq nuummut siulleq aallassasoq nal. 14.00 nuummullu tikilluni nal. 14.55. Massakkullu akunnernik arfineq pingasunik kinguarpoq, taamaasilluni nuummut timmisartuussineq siulleq pissaaq arfininngornermi nal. 23.00 missaani. Unnuaq naallugu sapaammilu ulloq tamaat nal. 19.30-p tungaanut timmisartuussisoqassaaq, pilersaarutaavoq kingulleq missasoq nal. 19.30. Hockeymik unammisartut minillugit timmisartuussinissat 31-t missaanniipput.