Ikiorneqarnissamut pisisarnissanullu pisariaqartunut atatillugu aningaasaliisinnaasut sapinngisamik amerlanerpaat Arctic Winter Games 2016ip (Matuma kingorna AWG2016) pissarsiariniarusuppai. Ikiorneqartariaqarnermut pisiarisariaqarnermullu atatillugu aningaasaliisussaqanngikkaangat, pisiniarnermi politikki ataani allassimasoq AWG2016ip naapertugassaraa.

Namminersorlutik Oqartussat Kaajallaasitaat 24.09.2010meersoq, nioqqutissanik pisiniarnermi sullinneqarnermilu pissutsinut tunngasoq, tunngaviusumik AWG2016mit najoqqutarineqarpoq, pisiassat neeqeroorutigineqaqqusat nalingi 200.000 koruunit sinnerneqassatillugit atuuttussaanera kisiat allaanerutillugu, Namminersorlutik Oqartussat 100.000 koruunit sinnerneqassatillugit kaajallaasitaq malittarisaraat.
 
Nioqqutissat pisiarineqartussat neqerooruteqartitsinikkut pissarsiarineqartussat immikkut AWG2016imit nalunaarsuiviliorneqassapput. Nalunaarsuiffik taanna pissarsiarineqarsinnaallunilu qinnutigineqarsinnaalissaaq, 2015imi qaammatit siulliit pingasut ingerlaneranni.
 
Malittarisassat AWG2016imit pingaarnertut naapertorneqartut:
Sullittariqarnerit nioqqutissallu pisiarisariaqakkat 200.000 koruunit sinnerlugit nalillit pissarsiariniarneranni, aallaaviusumik arlalinnik neqerooruteqartitsisoqartassaaq. AWG2016ip ingerlanneqarnissaanut atatillugu suliassanik suliarinnittuusinnaanissaminnut suliffeqarfiit tamarmik naligiimmik periarfissaqarnissaat, AWG2016imit tamatumani siunertarineqarpoq, tamatumuunalu pisiat naapertuuttumik akeqarnissaat qulakkeerneqasssalluni.
Suliassaq suliarinnittussarsiuunneqassanngitsoq allaffeqarfimmit aalajangerneqarpat, tamatumunnga pissutigineqartoq nassuiarneqassaaq. Suliarinnittussatut neqerooruteqartut tamarmik naligiittut naliliiffiortorneqassapput.
Tamatuma saniatigut, tamanut saqqummiisussaanermut malittarisassat AWG2016ip naapertugassarai.
 
Tunissutinut atatillugu pissutsit
Aningaasaliisunit tunissutigineqartut AWGp Allaffeqarfianit pigineqarput. Pisarnertut tunissutigineqartartut saniatigut, atorfilittat tunissutinik tigusaqaqqusaanngillat.

Avataanit siunnersortit atorneqarneri
Nutserisut eqqaassanngikkaanni, aallaaviusumik avataanit siunnersortissarsiortoqassanngilaq.

Nutserisut atorneqartillugit, akitigut suliarineqartussallu qanoq sivisutigisumik suliarineqarnissaanut aalajangersimasumik isumaqatigiissuteqartoqassaaq. Akissarsiaqartitsineq taakunanngalu akileraarutit A-t il.il. pillugit nalunaarsuineq, Kommuneqarfik Sermersuup akissarsiaqarnermut allaffiannit isumagineqartarput. Isertitanit akileraaruteqartitsinissaq suliffeqarfeqarfimmullu akitsuuteqartitsinissaq pillugu, Namminersorlutik Oqartussat nalunaarutaat nr. 10., 2011mi 20. septembarimeersoq naapertorlugu, immikkut siunnersortinik, aamma kisimiillutik aliikkusersuisut, eqqumiitsuliortut, nutserisut assigisaallu eqqarsaatigalugit, Nalunaarut 20. september 2011meersoq, § 7, imm.1, nr. 8 aamma 9 naapertorlugit.  
Suliassap naammassineqareernerani suliap suliarineranut akiligassaq immersorneqassaaq, cpr.nr. ilanngullugu, kiisalu pingaarnertut imaluunnit saniatigoorutigalugu sulinertut akileraaruteqarnissamut allagartaq, Kommuneqarfik Sermersuup akissarsiaqarnermut allaffiannit piniarneqarsinnaassalluni. Akunnerit suliffigisat nalunaarsuiffissaat Kommuneqarfik Sermersuup akissarsiaqarnermut allaffiani piniarneqarsinnaapput.
 
Eqqumiitsuliortutut inuussutissarsiortut, kisimiillutik aliikkusersuisartut assigisaallu aningaasartuutissat missingersorneranni ilanngunenqartut, siunnersortitut avataaneersutut matumunnga atatillugu isigineqassanngillat, naak nalunaarut qulaanin allassimasoq naapertorlugu akissarsiaqartinneqaraluarlutik.
 
Qulaani allassimasut siunnersortinut Kalaallit Nunaata avataani najugalinnut atuutinngillat.