Allannguutit pissuteqarput Nuummi  suli anorleramat sulilu apinissaanut aarlerinartoqarmat. Ammaanersiornissaq sapaammi nal. 20 aalajangiusimaqqavoq.

 

Air Greenlandip ilimagivaa aatsaat sapaammi ullaakkut timersortartut Kangerlussuarmiit angallanneqarsinnaalissasut, ullorlu taanna unnuamut angallassisoqassasoq. Kisianni AWG2016-ip sapaammi nal. 20 ammaanersiornissaq aalajangiusimaqqavaa. 

 

- Ajornanngitsuinnaassanngilaq” Maliina Abelsen oqarpoq, AWG2016-imi General Manager. 

 

- Qujanartumik ulloq unnuarlu kajumissutsiminnik suleqataasunik suleqatigisatsinnillu aamma ulapittoqaratta. Air Greenland suleqatigalugu timmisartuussinissat allanngortikkutsigit taava aamma timersornissat kulturikkullu pilersaarutit allanngussapput, AWG2016-imilu pisussanut tamanut sunniuteqassaaq. Inuusuttuaqqat timersortartut maaniinnerminni annertuumik pissarsiaqarnissaat pingaaruteqartikkaluarukkuluunniit – timersornikkut, kultureqarnikkut inooqatigiinnikkullu, taamaattorli pilersaarusiaq aamma aallartittariaqarparput. Suliarlu nutaamik aallarteqqipparput, kisiannili aallartitallu isumaqatigeereerluta aalajangiupparput pilersaarutaareersoq ammaanersiornissaq sapaammi nal. 20 allanngortinneqassanngitsoq. 

 

Maliina Abelsenip kajumissutsiminnik suleqataasunut nersualaarutissaqaangaatsiarpoq:

 

- Kajumissutsiminnik suleqataasut suleqatigisagullu tamarmik attaveqarfigisimasakka, aamma ullumikkut, suna tamaat ataqatigiisinnissaanut tunniussinissaminnut piumassuseqartorujussuupput. Tamarmik suleqatigalugit nuanneqaaq, tamannalu pillugu qanorluunniit aporfiit tamaasa aqqusaaraluarutsigit torrassuarmik aaqqissuussaqarpugut.

 

- Timmisartut aqagu aallarteriarutsigit aammalu ammaanersiornissamut amerlanerpaat tikiseriarutsigit, taava ataasinngorpamiit pilersaarut nutaaq atorlugu aallartissaagut.