Arctic Winter Games 2016-inimi peqataasuniit tamaniit Katuami nalliuttorsiortuni isiginnaartitsinera ippassaq siullermik ingerlanneqartoq qiaammernarluinnarpoq.
 
Isiginnaartitsinerup takutippaa nunani issittuni assigiissutsit assigiinngissutsillu nersorneqarnerat aamma inuit ileqqutoqaat soorlu torlorsorneq, qilaatersorneq oqaluttuaqattaannerlu assigiinngitsutigut takutinneqarpoq taamatuttaaq ilaatigut akorseqattaarnermik eqqumiitsulianik, qitinnik nutaalianik agiartunillu takutitsisoqarluni.
 
Isiginnaartitsinerup kusanarluinnartumik nutaalianik ileqqutoqqanillu, pereersut ullutsinnilu pisut, inuusuppaluttut misilittagaqarpaluttullu akuleriisillugit kulturikkut isiginnaartitsisoqarpoq.
 
”Kulturitta ataqatigiinnarat kisiannilu assigiinnginnerat paasisaqarfigaarput, nutaaliornerit ileqqutoqqallu takuagut, ileqqutoqqallu nutaalianngorlugit ataqatigiilersinnerat pissanganarluinnartumik takullutigu. Misigivarpullu inuusuttuaqqat eqqumiitsuliortut ullutsinnut issittunilu kulturikkut pissusitoqqat ataatsimoortilluinnarlugit takutitsisoqartoq. Isumaqarpunga tamanna inuunermut kajumilersitsisorujussuusoq siunissamullu neriulersitsisorujussuulluni” AWG2016-imi Generall Manager Maliina Abelsen oqarpoq.
 
Arctic Winter Games 2016-ip pisortatigoortumik facebookiani isiginnaartitsinermi assilisat takukkit, eqqaamallugulu aqagu Inussivimmi nal. 19 naggataarnersiortoqassamat taavalu nuutoqqami qummoroortaatinik isiginnaartitsisoqassammat nal. 21.