Arctic Winter Games kulturimik persuarsiorfiusarpoq kiisalu kulturikkut assigiinngissutsit assigiissutsillu pillugit ersersitsiffiusarluni. Kulturikkut paarlaateqatiginnerit sunniiveqatigiinnerillu unammiuaarnernut akulerunnissaat pingaartinneqarpoq. Nunat peqataatitaqartut tamarmik qitittartunik, nipilersortartunik erinarsortartunillu, isiginnaartitsisartunik kiisalu eqqumiitsuliortunik kulturikkut sammisassaqartitsisarlutillu aliikkusersuititsisarput. Kulturikkut aaqqissuussat Issittumi ileqqutoqqat nutaaliallu naapertorlugit aaqqissuussisoqartarpoq.   

AMMAANERSIORNEQ NAGGATAARNERSIORNERLU

"Uangut angerlarsimaffipput - illit angerlarsimaffiit" aqqutigalugu oqaluttuamik sinnattullu oqaluttualersaarutaannik pilersitsisimavugut. Ammaanersiorneq naggataarnersiornerlu 2 tiiminik sivisussuseqassapput, taakkualu kulturikkut misigisaqarfiussaaq AWG2016-illu naleqartitaanik ukunannga tunngaveqassalluni: ataatsimuussuseq, alapernaassuseq sapiissuserlu. NunaFonden-ip nunatsinni piffinni assigiinngitsunit ileqqutoqqanik nutaalianillu takutitsinissamut pimoorussinermik qulakkeerinninnissamut peqataasimapput, nunanilu allani issittormiunit allanik aamma peqateqarlutik takutitsissallutik. Isiginnaartitsivissamik sulisut nunanit avannarlerneersuupput, taakkualu kalaallinik isiginnaartitsivinni teknikkikkut suliaqartunit suleqatigineqassallutik. NAPA-p AWG2016-i suleqatigalugu kultuuritta pitsaanerpaaffii kulturikkullu kingoraartigut takutitsineq taanna aqqutigalugu takutissavaat. 

"Aaqqissuussaq Arctic Winter Gamesitut angitigitillugu pisariaqarpoq tamatta pisinnaasatsinnik tapersersuinissarput. NunaFondenip nuannaarutigalugu AWG2016'mi kulturikkut pisussat tapersersorpai.Taamaaliornikkut NunaFondenip Kalaallit Nunaata kulturia immikkuullareqisoq tapersersorpaa, Kalaallit Nunaata ilarujussuani inuiaqatigiinnut sunniuteqartussaq."
 

NAPA - Nunani Avannarlerni Piorsarsimassutsikkut Attaveqaat Nordisk Ministerrådip ataaniittoq. Uagut nunani avannerlerni meeqqanut inuusuttunullu piorsarsimassuseq ataavartoq tapersersorparput. NAPA 2006-imili Nunatsinniit kulturikkut Arctic Winter Gamesimut aallartitat isiginnaagassiaanik suliarinnittuusarpoq, ukioq mannalu tulluusimaarutigalugu takutittussaavarput isiginnaagassiaq musicaliusoq "Since Then". Uagut aamma AWG2016-ip aqutsisoqatigiiani kulturi pillugu peqataavugut, aammalu ammaanersiorneq naggataarnersiornerlu tapersersugaralugu.