Politikkimi matumani malittarisassiarineqartut, pisinnaatitaaffiit aamma pisussaaffiit pineqartut Arctic Winter Games 2016-ip ataani kajumissutsiminnik suleqataasunut tamanut atuupput.  

 

 

AWG2016-IMI KAJUMISSUTSIMIK SULEQATAANEQ

AWG2016-imik aaqqissuussineq Kalaallit Nunaata oqaluttuarisaanerani aaqqissusinerni assingusuni annerpaassaaq. Kajumissutsiminnik suleqataasoqanngippat tamanna iluatsinneqarsinnaanngilaq, taamaattumik kajumissutsiminnik suleqataasut pinngitsoorneqarsinnaanngillat. Kajumissutsiminnik suleqataasunit suliassat pingaarutillit amerlasuut suliarineqarput, AWG2016-illu iluatsilluarnissaanut aqqutissiueqataallutik. Taamaattumik kajumissutsiminnik suleqataasut peqataasullu isumannaatsumik, aamma pisinnaatitaaffiisa qulakkeerneqarnissaat siunertaralugu, malittarisassiuunneqarnissaat pisariaqarpoq. 

Kajumissutsiminnik suleqataasut pillugit politikkimi matumani siunertarineqarpoq AWG2016-imi kajumissutsimik suleqataanermi suut naatsorsuutigineqarsinnaanersut, sunik naatsorsuuteqarfigineqarnerit, suleqataanermi suut pissarsissutaassanersut aamma AWG2016-imi suleqataanermi malittarisassat allaaserineqarnissaat. 

 

 

AWG2016-IMI TIKERAARTITSISUNUT ILEQQORISSAARNISSAMIK MALITTARISASSAT  

AWG2016-ip kissaatigaa attuumassuteqartut tamarmik tunniusimallutik aamma AWG2016-imik sullissinerminni nuannaarutiginnillutik sulinissaannut atugassaqartitsinissamik qulakkeerinnissalluni. Immitsinnut attaqqeqatigiinnissarput pingaaruteqarpoq, pissuserissaarluta aamma sulisorisatsinnut akuersaartumik pissusilersussalluta.  

 

Tikeraartitsisut, kajumissutsiminnik suleqataasut, atorfilittat aamma siulersuisuni ilaasortat – AWG2016-imi suleqataanerminni ileqqorissaarnissamut malittarisassanik makkuninnga piumaffigineqarput:

 

• Nipangiussisimasussaatitaaneq 

AWG2016-imi sulisorisat aamma kajumissutsiminnik suleqataasut nipangiussisimasussaatitaapput, aammalu AWG2016-imi kajumissutsiminnik suleqataanermi ilisimalikkaminnik allanut ingerlatitseqqeqqusaanatik, paasissutissat tamanit takuneqarsinnaasussaanngippata. 

 

• Aaqqiagiinngissuteqarnermi iluarsiiniarneq 

Aaqqiagiinngissutigineqartut tikeraartitsisut iluminni aaqqissavaat. ataatsimiititaliami sulinerup iluani, nammineq iluarsineqarsinnaanngitsumik akerleriissuteqartoqalerpat, aaqqiagiinngissut iluarsiniarlugu ataatsimiititaliami siulittaasoq attavigineqassaaq, imaluunniit AWG2016-ip allatseqarfiani sulisoq pineqartumi akisussaasoq attavigineqassalluni. 

 

• Naligiissitaaneq 

AWG2016-imut attuumassuteqartut tamarmik naligiimmik pineqassapput. 

• AWG2016-p atortuinik aqqanillu atuineq 

Atortut atukkiuneqartut, biilit, illuutit, pigisat nalillit aamma atortut allat AWG2016-imit pigineqartut taamaallaat atorneqarsinnaapput AWG2016-imik sullissinermut atatillugu. 

 

AWG2016-p aqqa nammineq atugassanut pisiortornermi akikillisaaniutitut, imaluunniit kajumissutsiminik suleqataasut/sulisup pisinnaatitaaffiginngisaminut allanut immikkut pisinnaatinneqarnissaminut atornerlussanngilaa.  

 

Pingaaruteqarpoq AWG2016-imi suleqataasut tamakkerlutik ileqqorissaarnissamik malittarisassanik eqqumaffiginnillutillu malinninnissaat. 

 

 

 

AWG2016-IMI PINGAARTITAT

AWG2016-ilerisunut uagutsinnut pingaaruteqarpoq AWG2016-imut atatillugu kajumi ssutsiminnik suleqataasut AWG2016-imi pingaartitanik malinnissinnaanissaat:

• Ataatsimuussuseq - Issittumi inuiaqatigiit sumiinnerat apeqqutaatinnagu ataatsimoorfippassuit assigiinngiiaartut, aamma suliniummut nuannaalersitsisumut, inuit tamarmik peqataaffigisinnaasaannut ilanngutissavagut.

 

• Alapernaassuseq - Issittumi kattulluta ataatsimoorfiup ilagaatigut, aamma assigiinngissutsivut, assigiissutivut uagut allanit ilikkarsinaasavut aamma taakku uagutsinnit ilikkarsinnaasaat tappiffiginerusuppavut.  

 

• Sapiissuseq - Timersornermi, kulturimi ataatsimoorussaqanermilu ineriartornissatsinnut nutaanillu immitsinnut anguniagassinnitsinni sapiissuseq nukittussuserlu ammaanneqassapput.  

 

Kikkut tamarmik piginnaaneqarfitik atorlugit suliaqarnissaat pisariaqartinneqarpoq – ataatsimoorluta AWG2016-ip puigunaatsumik ingerlanneqarnissaa qulakkiissavarput. 

 

 

 

KAJUMISSUTSIMINNIK SULEQATAASINNAASUT KIKKUUSINNAAPPAT?

Kikkulluunniit AWG2016-imut kajumissutsiminnik suleqataanissamik nalunaarnissaannik kajumissaarpavut, suiaassuseq, inuiaassuseq, inuttut inissisimaneq, upperisaq innarluuteqarnerlu apeqqutaatinnagit. Ataatsimiititaliani (suliffeqarfiup aaqqissuussaaneranut linki) piumassutsiminnik suleqataarusuttut ukiui, tunuliaqutaat suliffiilu apeqqutaatinnagit akuutinneqalereerput. Kajumissutsiminnik suleqataasut suliassaat assigiinngitsorpassuupput, kajumissutsiminnillu suleqataasut sunik suliaqarnissartik (takuuk Nalunaarsorneqarnissamut ilitsersuut) sunniuteqaqataaffigisinnaavaat. Taamaattumik tamanut assigiinngitsorpassuarnik suliassaqarpoq. 

 

 

 

KAJUMISSUTSIMINNIK SULEQATAASUT IMMIKKOORTITERNEQARNERAT 

AWG2016-imi suleqatigiiaat assigiinngitsut akissarsiaqaratik AWG2016-imik sullissipput:  

• Inuit ataasiakkaat: Inuit ataasiakkaat akissarsiaqaratik sunngiffimminni AWG2016-imik sullisserusuttut.

• Ilinniartut: Ilinniartut ilinniarnerminnut atatillugu AWG2016-imik suliaqartut.  

• Suliffeqarfiit sinnerlugit sulisut: Suliffeqarfiit inuiaqatigiinni akisussaassuseqarnerminnik takutitserusuttut, sulisumillu kajumissutsiminnik suleqataanissaannik periarfisseerusuttut. 

• Suleqatigisat: Inuit, suliaminnut atatillugu aalajangersimasunik/suliassaqarfinnik aamma suliffeqarfimmik akisussaaffeqarfiisa assinginik AWG2016-imi suliaqartut. Taakku ataatsimiititalianut ilaasut suleqatigisatut isigineqarsinnaapput, assersuutigalugu ataatsimiititaliami Infirmarymi immikkut ittumik akisussaaffigalugu suliaqartut. 

 

Taamaattorli kajumissutsiminnik suleqataasut suleqatigiinnut assigiinngitsunut attuumassuteqartutut immikkoortiterneqarsinnaapput. Assersuutigalugu ilaat suliffeqarfimminnit kajumissutsiminnik suliaqartitaasinnaapput, sunngiffimminnilu aamma kajumissutsiminnik suleqataallutik. 

 

 

 

ATUUFFIIT

Kajumissutsiminnik suleqataasunit suliarineqartut atuuffinnut suliassanullu assigiinngitsunut immikkoortiterneqarput. Immikkoortiterinerit taakku kajumissutsiminnik suleqataasut sunik akisussaaffeqarsimanerannut, piffissamut suleqataaffigisimasaannut aamma piginnaanngorsarfigisimasaannut tunngasuupput. AWG2016-ip ingerlanneqareernerata kingorna kajumissutsiminnik suleqataasut uppernarsarneqarnissaannut, kingornalu nersorlugit qujaniarfigineqarnissaannut periusissamut tamanna iluaqutaassaaq. Immikkoortitikkat sisamaasut tassaapput:

• Chair of Committee/Co-Chair: AWG2016-ip ingerlanneqarnissaa sioqqullugu ataatsimiititaliani siulittaasut, aamma siulittaasut tullii. 

• Committee Members: AWG2016-ip ingerlanneqarnissaa sioqqullugu ataatsimiititaliani ilaasortat. 

• Supporting Volunteers: Kajumissutsiminnik suleqataasut AWG2016-ip allatseqarfianut assigiinngitsutigut tapersersuillutik suliaqarsimasut (Ataatsimiititalianut attuumassuteqanngitsut).

• AWG2016-ip ingerlanneqarnerata nalaani kajumissutsiminnik suleqataasut: AWG2016-ip ingerlanneqarnerata nalaani kajumisutsiminnik suleqataasut, taakkununnga ilanngullugit ingerlanneqarnissaata tungaanut, aamma 2016-imi februaarip ulluisa 29-anniit marsip ulluisa 16-iata kingorna suleqataasut. 

 

 

KAJUMISSUTSIMINNIK SULEQATAASUT INUUSUTTUT

Inuusuttut kajumissutsiminnik suleqataasut AWG2016-ip ingerlanneqarnerani akuunissaminnut, aamma qanimut peqataanissaminnut periarfissinneqassapput. Inuussuttut kajumissutsiminnik suleqataasut illersorniarlugit, ataani taaneqartunik, inuusuttut kajumisutsiminnik suleqataasut pillugit politikkiliortoqarpoq:

• Ukioqatigiikkaat: Inuusuttut kajumissutsiminnik suleqataasut inuusuttutut taaneqartut tassaapput 2016-imi februaarip ulluisa 29-anni minnerpaamik 13-inik ukoqalereersimasut, aamma annerpaamik 17-inik ukioqalereersimasut.

• Suliassat: Inuusuttunut kajumissutsiminnik suleqataasunut suliassat suliffissallu pillugit immikkut malittarisassiortoqassaaq, inuusuttunut 18-it inorlugit ukiulinnut sulinermi sullivinnut aqutsisoqarfiup maleruagassaanut aalajangersagaanullu naleqqussakkanik. 

• Angajoqqaat akuersinerannut uppernarsaat: Inuusuttunut kajumissutsiminnik suleqataasunut akisussaasoq angajoqqaat akuersinerannut uppernarsaammik atsiukkamik, aamma kajumissutsiminnik sulisut tamarmik akuerisassaannik akuersinermut uppernarsaammik atsiukkamik tunniussissaaq. Ilitsersorneqarumallutit takuuk ’Uppernarsaatit akuersinerillu pillugit immersuinissamik tunniussinissamillu ilitsersuut’.

• Inuusuttunik kajumissutsiminnik suleqataasussanik akuersineq: Kajumissutsiminnik suleqataasut timersortartullu isumannaatsuutinneqarnissaat qulakkeerniarlugu 15-inik, taakkulu sinnerlugit ukiullit tamarmik, meeqqanik pinerliisimannginnermut aamma pillagaasimannginnermut uppernarsaateqassapput. Inuusuttut 15-iniit 17-inut ukiullit meeqqanik pinerliisimannginnermut uppernarsaammik AWG2016-ip pissarsiniarnissaanut akuersissummik atsiussapput, inuusuttumullu akisussaasoq pinerlussimannginnermut uppernarsaammik pissarsiniarnissamut atsiukkamik akuersissalluni (takuuk ’Uppernaarsaatit akuersinerillu pillugit immersuinissamik tunniussinissamillu ilitsersuut’).

• Inuusuttunik kajumissutsiminnik suleqataasunik illersuineq: AWG2016-ip ingerlanneqarnerata nalaani inuusuttut kajumissutsiminnik sulisut suliaqartillugit ukiui ataatsimiititalianit eqqumaffigineqartassapput, aammalu sulinerisa nalaanni inersimasunik tamatigut najuuttoqartassalluni. 

• Kajumissutsiminnik suleqataasunut sammisaqartitsinernut peqataaneq: Inussuttut kajumissutsiminnik suleqataasut kajumissutsiminnik suleqataasunut sammisaqartitsinernut tamanut tikilluaqqusaassapput, taamaattorli ukiuinut naleqqussakkamik killilersuisoqarsinnaalluni. AWG-ip sammisaqartitsinerini imigassamik sassaalliisoqassanngilaq. 

 

 

 

PIGINNAASANIK INERIARTORTITSINEQ – KAJUMISSUTSIMINNIK SULEQATAASUNIK PIKKORISSARTITSINERIT

Kajumissutsiminnik suleqataasunik suleqateqarnermi piginnaasanik ineriartortitsinissaq pingaaruteqarpoq. AWG2016-itut immikkuullaritsigisumik suliaqarnermi inunni ataasiakkaani piginnaasanik inerisaanissaq pingaaruteqartarpoq. Kisianni amerlasuutigut pisariaqartinneqartassaaq pikkorissartitsinissamik assigisaannillu neqerooruteqarnissaq, kajumissutsiminnik suleqataasussanik pisariaqartinneqartunik naammattumik piginnaasalinnik pissarsinissaq ajornakusoortinneqarpat. Tamanna inunnut ataasiakkaanut, aammalu inuiaqatigiit ataatsimut isigalugit inerisaanissamut ilapittuutaassaaq. 

Marsimi 2016-imi unammiuaarnissat sioqqullugit kajumissutsiminnik suleqataasunut assigiinngitsunik pikkorissartitsisoqassaaq, ilaatigut internettikkut ilinniartitsivik atorlugit. Pikkorissartitsinissat pillugit paasissutissat AWG2016-ip nittartagaatigut ataavartumik paasissutissiissutigineqartassapput. 

 

 

 

KAJUMISSUTSIMINNIK SULEQATAASUNIK AKUERSINEQ

Kajumissutsiminnik suleqataasut tamarmik internettikkut AWG2016-ip paasissutissanik katersuivianut nalunaarsorneqassapput, ulluinnarni GEMS-imik taaneqartumut. Tamatuma saniatigut piffissami 2016-imi februaarip ulluisa 29-anniit marsip ulluisa 16-iannut kajumissutsiminnik suleqataasut meeqqanik pinerliisimannginnermut aamma pinerluttuliorsimannginnermut uppernarsaammik peqassapput, kiisalu AWG2016-imi sullissinerminni namminneq assiminnik ilisarnaatitalimmik ujamiusaqassallutik. Taamaallaat AWG2016-i sioqqullugu aamma ingerlatap naamaassereernerani kajumissutsiminnik sulisimasut pinerliisimannginnermik uppernarsaatinik pissarsiniarfigineqassanngillat. 

Ataani tulleriiaarlugit nassuiarneqarput 1) kajumissutsiminnik suleqataasut qanoq nalunaarsussanersut, 2) AWG2016-ip ingerlanneqarnerani kajumissutsiminnik suleqataasussat pillugit qanoq meeqqanik pinerliisimannginnermut aamma pinerluttuliorsimannginnermut uppernarsaatinik pissarsiniartoqassanersoq, kiisalu 3) inunnut namminernut tunngasunik ujamiusanik tunniussineq.

Nalunaarsuineq, immersugassanik pissarsiniarneq aamma uppernarsaatinik pissarsiniarluni immersugassanut ilitsersuutit pillugit, takukkit 'Uppernarsaatit akuersinerillu pillugit immersuinissamik tunniussinissamillu ilitsersuut’ aamma ’Nalunaarsorneqarnissamut ilitsersuut’.

 

 

 

NALUNAARSUINEQ 

• AWG2016-imut kajumissutsiminnik suleqataarusuttut internettikkut GEMS aqqutigalugu nalunaassapput.  Ugguuna nalunaarsorneqarit.

• Nalunaarsorneqarnissamut killiliussaq: GEMS-ikkut nalunaarnissamut killiliunneqarpoq 2016-imi januaarip ulluisa 31-at. Innersuussutigineqarporli kajumissutsiminnik suleqataarusuttut piffissaalluartillugu nalunaaqqullugit. 

• Kajumissutsiminnik suleqataasunut e-maileqanngitsunut: Kajumissutsiminnik suleqataarusuttut e-maileqanngitsut suleqataanissamut immersugassat atorlugit nalunaassapput, kingornalu attavigineqassallutik, imaluunniit Volunteer Centerimut saaffiginnissapput.

• Inuusuttunik kajumissutsiminnik suleqataarusuttunik nalunaarsuineq – Angajoqqaat akuersinerannut uppernarsaat: GEMS-ikkut nalunaarsorneqareernerup kingorna inuusuttumut kajumissutsiminik suleqataasussamut akisussaasoq (linki immikkoortumut ’inuusuttut kajumissutsimminnik suleqataasut’) angajoqqaat akuersinerannut uppernarsaammik, aammalu kajumissutsiminnik suleqataasussanut tamanut atuuttumik akuersinermik atsiussaaq, inuusuttup kajumissutsiminik suleqataasinnaaneranik akuersissutaasussamik. 

 

 

 

UPPERNARSAATIT – KAJUMISSUTSIMINNIK SULEQATAASUSSANIK MISISSUINEQ

AWG2016-imut peqataasut kajumissutsiminnillu suleqataasu isumannaatsuutinneqarnissaat qulakkeerniarlugu ataani taaneqartunik periusissialiortoqarpoq, piffissami 2016-imi februaarip ulluisa 29-anniit marsip ulluisa 16-iata tungaanut kajumisutsiminnik suleqataasut meeqqanik pinerliisimannginnermut aamma pinerluuteqarsimannginnermut uppernaasaateqarnissaat qulakkeerniarlugu.

 

 

 

 

KALAALLIT NUNAANNI – UPPERNARSAATIT PISSARSIARINISSAANNUT PERIUSISSAQ

• 15-inik taakkulu sinnerlugit ukiullit, piffissami 2016-imi februaarip ulluisa 29-anniit marsip ulluisa 16-iata tungaanut kajumissutsiminnik suleqataarusuttut, nalunaarsorneqareernermik kingorna meeqqanik pinerliisimannginnermut aamma pinerluuteqarsimannginnermut uppernarsaatinik AWG2016-ip politiinut pissarsiniarsinnaanissaa atsiorlutik akuersissutigissavaat.  

MALUGIUK: Inuusuttut 15-iniit 17-inik ukiullit AWG2016-ip meeqqanik pinerliisimannginnermut uppernarsaammik pissarsiniarnissaanut atsiukkamik pisinnaatissavaat, pinerluuteqarsimannginnermut uppernarsaammik pissarsiniarnissamut inuusuttoq sinnerlugu angajoqqaat/akisussaasut atsiukkamik akuersissutigissavaat. AWG2016 angajoqqaanut nakkutiginnittunulluunniit akuersissutinik pissarsiniarnissamut ikiuussinnaanngilaq, uppernarsaatilli immersornissaannut taamaallaat ikiuussinnaalluni. Takuuk 'Uppernarsaatit akuersinerillu pillugit immersuinissamik tunniussinissamillu ilitsersuut. 

• Immersukkat atsiorneqarsimasut, meeqqanik pinerliisimannginnermut aamma pinerluuteqarsimannginnermut uppernarsaatinik pissarsiniarnissamut akuersissutit ataavartumik politiinut aamma rigspolitinut nassiunneqartassapput, tassani misissorneqassallutik pinerluuteqarsimasunut nalunaarsuiffimmi pinerluuteqarsimaneq pillugu aalajangersaavigineqarsimanersut. Tamatuma kingorna uppernarsaatit eqqartuussissuserisumit misissorneqassapput, taannalu kajumissutsiminnik suleqataasinnaasut aqqiisa allattorsimaffiannik suliaqassalluni. Taamaalilluni AWG2016-imi kajumissutsiminnik suleqataasussat akuerineqarsinnaasut pillugit nalunaarfigineqartassaaq.  

 

• Uppernarsaatit AWG2016-ip ingerlanneqarnissaa qaammatialunnik sioqqullugu aatsaat politiinut nassiunneqarsinnaammata unammiuaarnissat qanillippata aatsaat kajumissutsiminnik suleqataasussat akuerineqassapput. AWG2016 immersukkanik pisinnaatitsissutinik 2015-imi septembarip qaammataaniit tigooraalissaaq. Kajumissutsimik suleqataarusulluni nalunaarnissaq kingusinnerpaamik pissaaq 2016-imi januaarip ulluisa 31-anni. 

 

 

 

PAASISSUTISSANIK OQAATIGEQQUSAANNGITSUNIK SULIAQARNEQ 

AWG2016 akuersissutinik katersuillunilu politiinut ingerlatitseqqiissaaq. . Inatsisileritooq uppernaarsaatinik politiinit nassiunneqartunik takunnissinnaassaaq. Taamaattumillu AWG2016-ip allatseqarfia paasissutissanik inunnut tunngasunik misissuissanngilaq, taamaallaalli inatsisilerituumit allattorsimaffimmik tigusaqassalluni, kikkut kajumissutsiminnik suleqataanissaminnut akuerineqarsinnaanersut akuerineqarsinnaannginnersulluunniit pillugit. Kajumissutsiminnik suleqataasussat taamaallaat nalunaarfigineqassapput uppernarsaatit aallaavigalugit unammiuaarnerni kajumissutsiminnik suleqataasinnaanngikkunik. Kajumissutsiminnik suleqataasussat akuerineqarsimasutut naatsorsuutigineqassapput, AWG2016-ip allatseqarfianit attavigineqarsimanngikkunik. 

 

 

 

IQALUNNNI – UPPERNARSAATIT PISSARSIARINISSAANNUT PERIUSISSAQ AAMMA PAASISSUTISSANIK OQAATIGEQQUSAANNGITSUNIK SULIAQARNEQ 

Iqalunni piumassutsiminik suleqataasussanut periutsit malittarisassallu immikkut ittut atuupput, canadami inatsisinit tunngavigineqassallutik (nutarterneqassaaq).

 

 

 

KAJUMISSUTSIMINNIK SULEQATAASUNUT NUNANIT ALLANEERSUNUT – UPPERNARSAATIT PISSARSIARINISSAANNUT PERIUSISSAQ 

Iqalunni, Kangerlussuarmi Nuummiluunniit kajumissutsiminnik suleqataarusuttut nunani tikeraartitsisuminngaanniinngitsut, Kalaallit nunaanni imal Canadami (Nunavut) najugaqanngitsut   meeqqanik pinerliisimannginnermut pinerlussimannginnermulluunniit uppernarsaatinik  nunagisaminneersumik tunniussissapput. Kajumissutsiminnik suleqataarusuttut nunanit allaneersut uppernarsaatinik tunniussinissartik namminneq isumagissavaat. Nunani allaneersut uppernarsaatinik piumasarineqartunik takutitsisinnaanngikkunik AWG2016-imi kajumissutsiminnik suleqataasinnaanngillat.  

Kajumissutsiminnik suleqataasut nunanit allaneersut Kalaallit nunaaniit imaluunniit Canada (Nunavut) najugaqarunik nunami tikeraartitsiviusumi kajumissutsiminnik suleqataarusuttunut periuserineqartoq malissavaat. 

Nunani tikeraartitsiviusuni kajumissutsiminnik suleqataasut Kalaallit nunaat imal Canada (Nunavut) allami kajumissutsiminnik suleqataarusuttut 

Kajumissutsiminnik suleqataasut Kalaallit Nunaanneersut imaluunniit Canadameersut, nunami tikeraartitsisumi nunaginngisaminni kajumissutsiminnik suleqataarusuttut, uppernarsaatinik pissarsiniarnissamut akuersissummik nunagisaminni tunniussissapput. 

 

 

 

KINAASSUTSIMIK ALLAGARTAQ

Piffissami 2016-imi februaarip ulluisa 29-anniit marsip ulluisa 16-iata tungaanut kajumissutsiminnik suleqataasut, suleqataaffissaminnut isersinnaaniarlutik, namminneq assiminnik assitalimmik allagartarmik takussutissamik atugaqassapput. 

Kajumissutsiminnik suleqataasut internettikkut nalunaarsuivik GEMS-i atorlugu assiminnik, allagartamut kinaassutsimik takutitsisumut atorneqartussamik tunniussissapput. Kajumissutsiminnik suleqataasut assiminnik nalunaarsuivikkut tunniussisinnaanngitsut volunteer@awg2016.gl-imut allassapput, kingornalu attavigineqassallutik. 

Allagartat kajumissutsiminnik suleqataasunut tunniunneqassapput, kajumissutsiminnik suleqataasunut tamanut paasissutissiilluni ataatsimiititsinerni ingerlanneqartartussani, (paasissutissiilluni ataatsimiititsinissanut linki) 2016-imi februaarip qaammataani. 

 

 

 

PAASISSUTISSIILLUNI ATAATSIMIITITSINERIT 

Piffissami 2016-imi februaarip ulluisa 29-anniit marsip ulluisa 16-iata tungaanut kajumissutsiminnik suleqataasussat tamarmik AWG2016-ip paasissutissiilluni ataatsimiititsinerisa ilaannut ataatsimut peqataassapput, 2016-imi februaarip qaammataani ingerlanneqartussamut. Mailikkut aggersaasoqassaaq. Atisat allagartallu tassani tunniussuunneqassapput, paasissutissanillu assigiinngitsunik pingaaruteqartunik paasissutissiisoqassalluni. 

 

 

 

AWG2016-IMI KAJUMISSUTSIMINNIK SULEQATAASUNUT QUJANIARNEQ 

AWG2016-ip ingerlanneqarnissaata pilersaarusiorneqarneranut kajumissutsiminnik suleqataasut pingaaruteqarluinnartumik inissisimapput. Taamaattumik kajumissutsiminnik suleqataasut suliaat pillugit nersorlugit qujaniarfigineqarnissaat pingaaruteqarpoq. Assigiinngitsunik aaqqissuussinikkut tamatuma pinissaa AWG2016-imit aaliangiunneqarsimavoq. 

 

 

 

Arctic Winter Games 2016 kajumissutsiminnik suleqataasut uniformiat  

Arctic Winter Games 2016 kajumissutsiminnik suleqataasut uniformiat makkuninnga ilaqarput: 

• AWG2016 Kavaajaq  

• AWG2016 Aaqanngitsoq

• AWG201allagartaq kinaassutsimik takutitsisoq

• AWG2016 Kappoqqut

Kajumissutsiminnik suleqataasut piffissami februaarip ulluisa 29-anniit marsip ulluisa 16-iata tungaanut piumasarineqartutut nalunaaquttat akunnerini 20-ni suleqataasussat kajumissutsiminnik suleqataasut uniformiannit pissarsinissaminnut pisinnaatitaapput. Uniformi kajumissutsiminnik sulisunik paasititsilluni ataatsimiititsinerni agguaanneqassaaq.  

 

 

 

 

KAJUMISSUTSIMINNIK SULEQATAASUNIK NUANNATSITSINEQ 

AWG2016-i naammassineqareerpat qujaniarluni nuannatsitsisoqassaaq, AWG2016-imi kajumissutsiminnik suleqataasut tamarmik qaaqqusaaffigisassaannik. 

 

 

 

PIUKKUNNARTUSSARSIORNEQ 

Kajumissutsiminnik suleqataasut AWG2016-ip ingerlanneqarnerani kaammattorneqassapput kajumissutsiminnik suleqatit akornanni piukkunnartunik toqqaaqqullugit, assersuutigalugu: “kajumissutsiminik sulisoq qiimanerpaaq”, kajumissutsiminik sulisoq sullissillaqqinnerpaaq”, “kajumissutsiminik sulisoq sulilluarnerpaaq”.  Toqqarneqartut kajumissutsiminnik suleqataasut nuannatsinneqarneranni tamanut saqqummiunneqassapput, toqqarneqartullu immikkut ittumik  AWG2016-imit tunissuteqarfigineqassallutik.  

 

 

 

AJUMISSUTSIMIK SULEQATAANEQ PILLUGU UPPERNARSAANEQ 

Unammiuaarnerit naammassereernerini kajumissutsiminnik suleqataasut AWG2016-ip ingerlanneqarnerani kajumissutsiminnik suleqataasimanerminnut uppernarsaammik pissarsisinnaapput. Matumani immikkoortinneqassapput ataatsimiititaliani siulittaasut, ataatsimiititaliani siulittaasut tullii, ataatsimiititaliani  ilaasortat, AWG2016-ip ingerlanneqarnerani (piffissami 29.02 – 16.03 2016) kajumisutsiminnik suleqataasut, aamma allatseqarfimmut assigiinngitsutigut kajumissutsiminnik suleqataasut. Kajumissutsiminnik suleqataasut piginnaanngorsaalluni pikkorissartitsinernut peqataasimappata tamanna aamma uppernarsarneqassaaq.  

 

 

 

KAJUMISSUTSIMINNIK SULEQATAASUNIK SULLISSINEQ

 

 

VOLUNTEER CENTERI

Kajumissutsiminnik suleqataasut annertunerpaamik tunniussisinnaanissaat, aammalu peqataanerminni puigunaatsorsinissaat siunertaralugu, sulineranni pitsaasunik atugassaqartinneqassapput. Ataatsimoorneq attaveqaqatigiinnerlu inissaqartinneqarlutik.  

Volunteer Centeri kajumissutsiminnik suleqataasut qullersaqarfigaat. Tassani paasissutissanik pissarsisinnaapput, ikiorneqarsinnaallutik aammalu sulinerminni naapeqatigiinnerminnilu atorsinnaallugu. Unammiuaarnissat ingerlanneqarnissaat sioqqullugit ataatsimiititaliat  tassani ataatsimeeqatigiittarsinnaapput. Unammiuaarnerit ingerlanneqarnerini kajumissutsiminnik suleqataasunut tamanut sullissiviussaaq. 

Najugarisaq:

AWG2016 VOLUNTEER CENTER 

Kuussuaq 17, B31 

3900 Nuuk

 

 

OQARASUAATIKKUT IKIORSIIVIK / HOTLINE

Unaammiuaarnerit ingerlanneqarnerat tamakkerlugu kajumissutsiminnik suleqataasunut oqarasuaatikkut ikiorsiivik/Hotline Volunteer Centerimi atuutitinneqassaaq. Kajumissutsiminnik suleqataasut apeqqutissaqarunik tassunga saaffiginnissinnaassapput. 

 

 

 

KAJUMISSUTSIMIK SULISUNUT PAASISSUTISSIINERIT

Nutaarsiassatut allakkiaq: AWG2016 kajumissutsiminnik suleqataarusullutik nalunaarsimasunut 2015-imi septembarip qaammataa aallarnerfigalugu qaammatikkaartumik nutaarsiassatut allakkiamik nassiussuisassaaq. 

Kajumissutsiminnik suleqataasunut nittartakkakkut ataavartumik assigiinngitsunik nalunaaruteqartoqartassaaq. 

 

 

 

SILLIMMASIINEQ

Kajumissutsimik suleqataaneq nammineq akisussaaffigineqarpoq. AWG2016-ili kajumissutsimik suleqataanermut atatillugu kajumissutsiminnik suleqataasut sulinermi akisussaanermut aamma sulitilluni ajoqusernermut sillimmateqartinneqarput. AWG2016-i annaasaqarnissanut ajoqusernissanullu assigiinngitsunut pitsaaliuiniarluni imminut pisinnaatinniarpoq. 

 

 

 

PIUMASSUTSIMIK SULEQATAANERMI MALERUAGASSAT 

AWG2016-imi kajumissutsiminnik suleqataasut suleqataanerminni eqqumaffigisassaat ataani nassuiarneqarput. 

 

 

 

TUSAGASSIUUTINUT ATTUUMASSUTEQARTUNULLU ATTAVEQARNEQ

AWG2016-ip kissaatigaa AWG2016-ip siammasissumik ilisimaneqalernissaa. Taamaattumik kajumissutsiminnik suleqataasut tusagassiuutinit apersorneqarnissamik aamma suliniutit pillugit allaatiginninnissamik il.il kissaateqaraangata qujarunneqartarput. Kajumissutsiminnik suleqataasut tusagassiorfinnit, ilinniartunit allanilluunniit saaffigineqarunik oqaaseqaatissatik ataatsimiititaliami  attuumassuteqarfigisaminni siulittaasoq peqatigalugu ataqatigiissartassavaat. Kajumissutsiminnik suleqataasut suliani aalajangersimasuni kajumissutsimik suleqataasutut taamaallaat oqaaseqaateqarsinnaapput, kisiannili assersuutigalugu politikkimut tunngasunik aamma AWG2016-isinnerlugu oqaaseqarsinnaanatik.  

AWG2016-ip innersuussutigaa kajumissutsiminnik suleqataasut akuersaarneqarsinnaanngitsunik sunilluunniit naammattuiinerminni suliffeqarfimmut tamatuminnga ilisimatitsisarnissaat, ajornartorsiutillu tusagassiorfiit aqqutiginagit tassani iluarsiniartarlugit. 

 

 

 

 

NIPANGIUSSISIMASUSSAATITAANEQ 

AWG2016-imi kajumissutsiminnik sulisut tamarmik nipangiussisimasussaatitaapput. Nipangiussisimasussaatitaaneq isumaqarpoq AWG2016-imut kajumissutsimik sulinermut atatillugu ilisimalikkanik paasissutissanik ingerlateqqinneqartussaanngitsunik kajumissutsiminik suleqataasoq ingerlatitseqqissanngitsoq. Taamatuttaaq paasissutissanik ingerlateqqinneqartussaanngitsunik kajumissutsiminnik sulisut akornanni imaluunniit suleqataasunut ingerlatitseqqittoqassanngilaq, tamanna sulianut tunngatillugu tunngavissaqarluartumik pinngippat.  

 

 

 

ANINGAASAQARNEQ 

Ataatsimiititaliani siulittaasut: 

Ataatsimiititaliani siulittaasut attuumassuteqarfimminni akisussaasuulluni aqutsisumit akuersissummik atsiukkamik pissarsisimatinnani aningaasanik atuisinnaatitaanngilaq. Pisiniarnissamut akuersissut atsiugaq pisiariniakkamik nalunaarsimasutut tunniunneqassaaq, akisussaalluni aqutsisumit imaluunniit piginnaatinneqartumit allamit atsiorneqarsimassalluni.  Ataatsimiititaliami siulittaasup peqannginnerani siulittaasup tullia piginnaatinneqassaaq, akisussaatut aqutsisup atsiugaanik. 

Ataatsimiititaliani ilaasortat allat aamma kajumissutsiminnik suleqataasut:  Ataatsimiititaliami ilaasortat allat aamma kajumissutsiminnik suleqataasut sukkulluunniit aningaasatigut atuisinnaatitaanngillat. 

Aningaasartuutit utertinneqassanngillat. 

 

 

 

PIGINNEQQAARTUSSAATITAANEQ, KISERMAASSISUSSAATITAANEQ, ATUINISSAMUT PISINNAATITSISSUTIT IL.IL. 

Kajumissutsimik suleqataasutut akuersissutigineqarpoq AWG2016 sullillugu aamma AWG2016 suleqatigalugu atortussiatut suliarineqartut tamarmik AWG2016-imit pigineqarmata, AWG2016-ilu tamatumunnga akiliuteqartussaanani, tamatumunnga ilaallutik suliaqaqqaartutut pisinnaatitaaffiit aamma suliarineqartup allanngortinneqarsinnaaneranut pisinnaatitsineq. Aammattaaq assiliineq imaluunniit aaqqissuussinernik kajumissutsiminnilluunniit suliaqartunik videomik immiussinerit AWG2016-imit atorneqarsinnaassapput, nittarsaassinernut, nalunaarusiornernut, takoqqusaarusiornernut aamma allanut sunulluunniit tunngatillugu, kajumissutsimik suleqataasutut akerliliisinnaatitaanani, aamma atorneranut akileeqqusisinnaatitaanani.

 

 

 

PEERSITSINEQ AAMMA SORAARSITSINEQ  

AWG2016-ip malittarisassaanik aamma maleruagassiaanik, akuersinermut uppernarsaammik, nunap inatsisaanik imaluunniit allatigut AWG2016-ip anersaavanut soqutigisaanullu malittarisassanik uniuuttumik iliuuseqarnermi unioqqutitsinermilu, imaluunniit sumiginnaanermi AWG2016 imminut pisinnaatippoq kajumissutsiminik suleqataasumik soraarsitsilluniluunnit peersitsisinnaassalluni.

 

 

 

ATTAVEQARFISSAQ

Kajumissutsimik suleqataaneq pillugu ilitsersuutit allat nittartakkami www.awg2016.gl-imi nassaarineqarsinnaapput. Tamatuma saniatigut kajumissutsiminnik suleqataasut uunga saaffigisinnaapput uunga allalutik volunteer@awg2016.gl,  oqarasuaammaut +299 382016-imut sianerlutik imaluuniit volunteer centerimut aqqusaarlutik.