Iqaluit Hockeymik unammisartut Iqalunni ilassilluarneqarput
Hockeymik unammisartut angalanissaannut pilersaarutaat allanngornikuugaluartoq, kajumissutsiminnik suleqataasorpassuit timersortartullu qiimanerat annikillisimanngilaq. Ilassilluarneqarput ajornartorsiutillu tamaasa aqunneqarluarlutik.
”Immikkut ittumik hockeymik unammisartut inuillu tamarmik Iqalunni taakkununnga atassuteqartut tamaasa inuulluaqqorusuppakka. Ammaanersiornermi soorunami peqataatikkusunnarnikuugaluaqaat, kisiannili nuannaarutigivara Iqalunni ilassilluarneqarmata, timersortartullu Nuummi peqataanngitsut ilisimassavaat nuannaarutigigatsigu peqataagassi aamma eqqarsaatinik nuannersunik nassippatsigit” Maliina Abelsen, AWG2016-imut General Manager oqarpoq.
”Suna tamaat ataqatigiisinniarlugu ulluni kingullerni ulapittoqarnikuuvoq, kisianni Iqalunniit tusakkakka malillugit nalunaartoqarpoq kajumissutsiminnik suleqataasut piumassuseqarluarsimasut, hockeymik unammisartunullu sinaakkutissanik ajunngilluinnartunik pilersitsisimallutik. Nuanneqaaq. Kajumissutsiminnik suleqataasut qujassutissaqarfigingaatsiarpagut.”
Sila kinguaattoornerillu pissutigalugit, taamatuttaaq hockeymik unammisartut atortui apuunnissaannut ajornartorsiuteqartoqarsimaneq, Iqalunni ikiuuttut sila pissutigalugu AWG2016-imi unammillernartut malugilluinnarpaat. Taamaattumik Maliina Abelsenip immikkut illuinnartumik ukua timersortartut inuillu tappiffigai:
”Hockeymik unamminerni inerneri takkussuutilernissai massakkut pissanganaraarput – neriorsorpassilu naggataarnersiortitsilluarumaarluta, taava timersortartut ippassaq unnukkut ammaanersiornermi peqataanngitsut, Iqalunniittut ilanngullugit, aamma timersorneriinnaanngikkut inooqatigiinni kulturikkullu AWG2016-imi misigisaqarniassammata.”