Inuusuttut eqqumiitsuliortut AWG2016 postkortiliorput

TELE-POST inuusuttut eqqumiitsuliortut sisamat suleqatigalugit pilersippaat postkortit arfinillit kusanarluinnartut Arctic Winter Games 2016-mut, aamma taaneqartut GO CARDs

AWG2016 GO CARDs arfiniliusut kusanartunik najoqqutaqarput, inuusuttunit eqqumiitsuliortunit piginnaaneqarluartunit sisamaasunit suliarineqartut. Tassaapput: Ivínguak’ Stork Høegh, Kristine Kreutzmann, Lisa Kreutzmann aamma Poul Møller, tamarmik Nuummi Eqqumiitsuliortut Ilinniarfianni ilinniartuusimasut. AWG2016-mut aalajangiinermi tunngavik pingaartoq tassaavoq GO CARDs inuusuttunut eqqumiitsuliortunut suliarisassiissutigineqarnerat. Taamaaliornikkut eqqumiitsuliortutut piginnaasaminnik ineriartortitsinerisa saniatigut Nunatsinnut iluaqutaasumik suliaqarput.

”GO CARDs arfiniliusut takutippaat eqqumiitsuliortut namminneq AWG2016-oqaasinnaavanut ‘PEQATAAGIT - MISIGISAQARIT - PISSIGIT’-mut qanoq nassuiaateqarnertik. GO CARDs AWG2016-mi pisussanut paasisaqartitsipput. Qanga Inuit pinnguaataat kiisalu ullutsinni ukiuunerani timersuutit imminnut akoorluarneqarput”, taama oqarpoq pisortamut tullersorti Arnakkuluk Jo Kleist.

GO CARDs pineqartut assersuutigalugu qallunaat café-vini atorneqarput, sutoriartut tigusinnaasaat - akeqanngitsut. Atorneqarsinnaapput kusassaatitut, nillataartitsivimmut nivinngagassatut - imaluunniit allakkerisarfikkut nuannarisamut inuulluaqqussutitut. Piffissami aggersumi, AWG2016 ukioq tulleq marsimi ingerlanneqareernissaata tungaanut, Nuummi café-ni sumiiffinnilu aalajangersimasuni GO CARDs pissarsiarisinnaassavatit.

Januar 2015-mi TELE-POST kiisalu AWG2016 saqqummersippaat frimærki AWG2016-mut iluaqutaasussaq. Frimærkimik saqqummersitsineq nangitseqartillugu postkortit arfinillit angisuut kusanartut saqqummersinneqarput.