Arctic Winter Games 2016-imut ambassadørit (sinniisuutitat) assigiinngissitaartunik piginnaanillit maanna tamakkerput, taakkulu suliassaraat AWG2016-ip oqariartuutaanik siammarterinissaq aamma tikeraartitsisuunermik tapersersuinissaq.
 
“Ambassadørit assigiinngitsunik piginnaanillit toqqarpavut, sumiiffinnik assigiinngitsunik sinniisuusussat aammalu assigiinngitsunik soqutigisallit. Arctic Winter Games-ip tunngavigilluinnagaatut ambassadørit assigiissutigisaat tassaavoq timersornikkut, kulturikkut imaluunniit kajumissutsimik suleqataanerup iluani malugineqarsinnaasumik iliuuseqarsimammata. Aammattaaq pingaartipparput AWG2016-imi nuannaarnerup siaruarterneqarnissaanut peqataasinnaanissaat. Ambassadørit suliassamik tigusiumallutik akuersinerat nuannaarutigisorujussuuarput, tamannalu pingaartittorujussuuaarput”, General Manageri Maliina Abelsen oqarpoq.
 
Apriili 2014-imiit decembari 2015-ip tungaanut AWG2016-imut ambassadørit katillugit qulit toqqarneqarput. Toqqarneqartut siulliit tassaapput erinarsortartoq Kimmernaq Kjeldsen aamma sulorartartoq Frederik Elsner. Aaqqissuussinermi One Year To Go-imi 2015-imi marsip ulluisa arfernanni pisumi allat pingasut toqqarneqarput, tassaasut Issittormiut pinnguaataannik timersortartoq Tonny Fisker, arsaattartoq Nivi Mathiassen aamma AWG2002-mi Iqalunni General Manager-iusoq Victor Tootoo. Ujakkaartartoq Niviaq Chemnitz Berthelsen aamma ukiorpassuarni N.A.I.P-mi suleqataasoq Ane Berthelsen kiisalu Tae Kwon Do-mik issittormiullu pinnguaataannik timersortartoq Bolethe Stenskov 2015-ip ukiaani toqqarneqarput. Iqalunni kulturikkut malunnaateqarluartoq Laakkuluk Williamson Bathory kingullertut Iqalunni toqqarneqarpoq. Ambassadøritut kingullerpaatut toqqarneqartoq tassaavoq kajumissutsiminik suleqataalluartartoq Sisimiuneersoq Laarseeraq Skifte.
 
Ambassadørit AWG2016-imut tunngatillugu assigiinngitsutigut aaqqissuussinerni, paasititsiniaanerni, kajumissutsiminnik suleqataasussanik pissarsiniarnermi aamma oqalugiarnerni peqataareerlutillu ingerlatitseqqissapput. Qaammatini tulliuttuni aammalu AWG2016-ip ingerlanneqarneqarneranni suliaat malinnaaffigikkit. 

Saamiatungaaniit: Ane Berthelsen, Tonny Fisker, Kimmernaq Kjeldsen & Niviaq Chemnitz Berthelsen

Nivi Mathiassen & Bolethe Stenskov Qaqortup Timersortarfiani AWG2016 pillugu saqqummiisut.

Iqalunni ambassadørit qorsunnik kavaajaqarput, saamiatungaani: Laakkuluk Williamson Bathory taavalu Victor Tootoo talerpiatungaaniilluni. Laakkuluup ilaqutai Kulullu aamma assimi ilaapput.