Maliina Junge Jørgensen 2000-mi Whitehorsemi peqataavoq, peqataareeramilu angalarusussusaa alliallappoq. Ukiut arlallit qaangiummata Canadami ilinniareerluni Trent Universitiitimiit naammassivoq.

"AWG qularnanngitsumik timersornerinnarmik imaqanngilaq. Taamak isumaqavippunga, pissutigalugu nammineerlunga ukiut 15-it matuma siorna Whitehorsemi badmintonimi peqataanikuugama. Taamani siullerpaamik Kalaallit Nunaat qimallugu angalavunga, tamassumalu kingorna meeqqat atuarfiat naammasseriarukku Nunarsuaq kaajallakkusullugu angalanissaa pilerigilerpara. Taamaasiorpungalu. Katillugu ukiut qulingiluat nunani allani najugaqarpunga ilinniagaqarniga pissutigalugu. Taamaattumik aaqqissuussami taamaattumik peqataalluni siunissaq ungasinnerusoq eqqarsaatigalugu qularnanngitsumik pilerisitsilersinnaavoq, ilinniagaqarnissamut, aammalumi inuttut ineriartorneq eqqarsaatigalugu."

Maliina Junge Jørgensen tulluusimaaqaluni ukioq 2000 Whitehorsemiit Nuummut angerlarluni tikittoq sølvimik bronzemillu ulunnassimalluni.