Tallimanngorneq novembarip 21-at tassaassaaq ulloq AWG2016-imut immikkorluinnaq malunnaatilik. Ullormi taanna AWG2016-imi ataatsimiititaliat tamarmik siullermeersumik katersuutissapput, suliarlu innuttaaasunut tunniusimalluartunut siammarterunneqassaaq.
 
AWG2016-ip ataani ataatsimiititaliat 57-it pilersinneqarput. Taakku tamarmik immikkut suliamik akisussaaffiligaassapput, AWG2016-ip allattoqarfia suleqatigalugu ingerlatassaminnik. Tassa maanna tamakkiinerusumik pilersaarusiat takorluukkallu immikkuualuttukkuutaamik pilersaarusiorlugit ingerlanneqalissapput unammiuaarnissallu qanorpiaq naammassiniarneqarnissaat  pilersaarusiorneqalerlutik. Tallimanngornermi arfininngornermilu ataatsimiititaliat siulittaasui tamarmik siullermeerlutik isumasioqatigiissapput, tamannalu tassa ataatsimiititaliat sulilernissaannut allarniutitut ingerlanneqassaaq.

• Suliniummik ingerlatsineq tassa iluamik AWG2016-ip allattoqarfianit anillagulluni aamma ingerlasinnaanngorpoq. Suliniutip iluatsilluarnissaanut assorsuaq pingaaruteqarpoq, inuppassuit aalajangersimasunik sammisalinnik akisussaaffinnik tiguserusullutik nalunaarsimammata, General Manager Maliina Abelsen oqarpoq.

Tallimanngornermi arfininngornermilu isumasioqatigiinnermi sammineqarnerussapput, qanorpiaq ataatsimiititalianut siulittaasuuneq paasisariaqarnersoq aammalu qanoq ilillutik ikioqatigiillutik suliniummik kivitseqataasinnaassanerlutik. Aammalu piffissaqarfigissavaat ataatsimiititaliat akimorlugit imminnut ilisareqatigiinnissartik.

• Tassa manna AWG2016-imut qaaqqusisuusutut inissisimanerup inuiaqatigiinnut siammarterunneqarnera siulleq. Piffissap ingerlanerani amerlanerujartuinnartut akuutinneqalissapput taaavalu 2016-imi Kalaallit Nunaat peqatigiissoq nunatsinni aaqqissuussinerit taama ittut anginersaanni qaaqqusisutut inissisimalluni ingerlatsissaaq, Maliina Abelsen naggasiivoq.

Ataatsimiititalianut siulittaasut inuupput assigiinngitsorpassuarnik soqutigisaqarlutillu piginnaaneqarfillit. Ilaasa suliassartik ilisimasaqarfigilluareerpaat, allallu suliassamut nutaarluinnarmut pulassapput. Tamarmik nukiit annertuut suliassaminnut atorniarpaat, akilerneqaatigissallugu inuunerminni immikkorluinnaq ilinniarfiusumik misigisaqarnissartik, unammilligassanik imminnut nutaarluinnarnik sorsutassaqarfigisassaminni.