AWG2016-ip ammaanersiornissaanut matut ammarneqassapput nalunaaqutaq 20.00 taamaasilluni issittormiut timersortartui hundredikkuutaat arlaqartut piareersimalerput Kalaallit Nunaata oqaluttuarisaanerani pisussami annerpaami. Kunngikkormiu ataqqinartoq Kunngissaq Frederik ammaanersiornermi aamma peqataassaaq.

Nuummi ullut anorlerfioreersut, apiffioreersut ersernerloreersorlu AWG2016-imi inuit, kajumissutsiminnik suleqataasorpassuillu aamma suleqatigisarpassuit annertuumik pingaarutilimmillu naammassisaqarlutik nalunaarsinnaanngussapput, sapaammi nal. 20 Inussivimmi ammaanersiorneq aallartinneqareerpat.

”Naluneqanngitsutuut ulluni kingullerni sila piuminaalliortitsisimavoq, taamaattumik nuannaarutigisorujussuuvarput timersortartorpassuit tikissimalerat, pingaaruteqartorlu issittumi unammiuaarnerit pisortatigoortumik ammarneqarnissaat. Aallartitat tamarmik unnugu peqataatitaqassapput ilimagivaralu kikkut tamarmik aallartittoqarnissaanut pilerisoqartoq” taamak oqarpoq Maliina Abelsen, AWG2016-imut General Manager.

Peqataasussat kingulliit Nuummut unnuup unnuallu ingerlanerani tikissapput.

”Unnugu ammaanersiornissamut pilersaarusiaq kusanartorujussuuvoq neriorsuutigisinnaavaralu kikkut tamarmik nuannersumik misigisaqarumaartut. Ammaanersiornermi taamatut ittoq siullerpaajuvoq piviusoq soqutiginartorlu. Naak Air Greenland, Issittumi Sakkutooqarfik hjemmeværnilu, Kangerlussuaq tamakkipajaarlugulu kajumissutsiminnillu suleqataasut hundredikkuutaartut AWG-ip allattoqarfia suleqatigalugu ulluni arlaqartuni ulloq unnuarlu ingerlarsoreeraluartut, taamaattoq unnugu pisussami aatsaat misiginassaaq tassa aallartittugut. Nuanneq.

Inussivimmi ammaanersiornermi aallartitat isaassapput, kulturikkut tunngasumik ilanngussassaqassaaq, oqalugiartoqassaaq il.il.