AWG2016-ip aaqqissuussaanera

Namminersorlutik Oqartussat, Kommuneqarfik Sermersooq suliffeqarfiillu AWG2016-imut piginnittuupput tikeraartitsisuusussaallutillu. Kisianni ulluinnarni sulineq piareersarnerlu pisortaq (General Manager) siuttoralugu AWG2016-ip allaffeqarfiani ingerlanneqarpoq. Allaffeqarfimmi sulisut tamarmik immikkut akisussaaffeqarput, soorlu assersuutigalugit timersorneq, kulturi attaveqaqatigiinnerlu. Allaffeqarfimmili sulisut suliassat tamaasa kivissinnaanngilaat. Taamattumik ataatsimiititalianik assigiinngitsunik pilersitsisoqarnikuuvoq. Ataatsimiititaliat nammineq kajumissutsiminnik sulisunit aamma/ imaluunniit suliffeqarfiit sulisuminnik atukkiussaannik ilaasortaqarput. Ataatsimiititaliat tamarmik siulittaasoqarlutillu siulittaasumut tullersorteqarput. Ataatsimiititaliani sulisut piginnaasanik ulikkaarput suliniutillu AWG2016-ip iluatsilluarnissaa anguneqassappat taakku pingaaruteqarluinnarput. Uani takusinnaavat suliniut qanoq aaqqissugaanersoq, immikkoortortallu ataasiakkaat ataanni ataatsimiititaliat suunersut.