Aallartinneqaannaqaaq
Sapaammi unnukkut Arctic Winter Games 2016 ammaanersiornersuarmik aallartinneqarpoq. Tivaneq rappernerlu (ataatsikkut), rocki, erinarsoqatigiinneq, uaajeerneq, kaavikulooq hiphopernerluni navianarluinnartoq.
Inussivimmi takutitsineq alutornarluinnartoq kikkunnut tamanut assigiinngitsunik iluarisalinnut takutitsivoq, isiginnaartunik 1000-it pallillugit najorneqartumik aamma KNR-ikkut toqqaannartumik isiginnaarutikkut nittartakkakkullu isiginnaarneqartumik, kisitsisaat suli ilisimaneqanngilaq.
- Tupinnarluinnarpoq. Takutitsinerni takunikuusanni pitsaanerpaavoq, nuannaarpasingaaqaluni Alaskaminngaanniit tusagassiortoq oqarpoq.
Ajasoorpaseqqallunittaaq isiginnaartut akornanniippoq Kunngikkormiu ataqqinartoq Kunngissaq Frederik – timersortarfimmut isermat isiginnaartorpassuarnullu aalaterimmat unnuk taanna immaqa annerpaamik ersaattaattoqarpoq. Naak peqataasussat ilai amigaataagaluartut, sapaatip akunnerata naanerani silarlummat kinguaattoortunik, aallartitat tikinnikut tamarmik Katuamukarput Inussivimmullu ingerlaaqatigiillutik, isiginnaartut akuttoqatigiissunik ersaattaallutik isaatitsipput. Tamaani taanna tusaamasaq ikualaneq ikinneqarpoq qamuteralannillu Katuap silataanut inissisimaffissaanukaanneqarluni, tassani sapaatip akunnera tamaat ikumassaaq.
Peqataasussat kingulliit tikissimaleriarput, unammiuaarnissamut kulturikkullu pilersaarusiaq aatsaat iluamik aallartissinnaanngorpoq. Join. Feel. Jump!